$1.9 Miliona Tala Mo Aiga e To’a 395 e Aofia ai ma Nisi Pisinisi O Le Tauai mo Aseta Na A’afia I Le Fa’aletonu O Le ‘Eletise

2026-02-27 - 01:57

Ua fa’amaonia e le Kapeneta le lipoti o le aotelega o le iloiloga ma le tau aofa’i o taui o aseta ma meatotino a le atunu’u āiga ma pisinisi ua fa’aleagaina ona o le fa’aletonu o le ‘eletise iā Mati aga’i iā Aperila 2025. O lea lipoti na fa’amautū e le Komiti Galulue e tauala mai i le Ofisa mo Fa’alavelave Matuiā ma Tutupu Fa’afuase’i. Mo le silafia ina ua fa’amaonia e le Afioga i le Ao Mamalu o le Mālō, e tusa ma le Matā’upu 105 ma le Vaega 106 o le Fa’avae o le Mālō Tuto’atasi o Samoa, le i ai o Samoa i se tulaga o fa’alavelave tutupu fa’afuase’i, na amata mai ai i le vaeluaga o le Aso Gafua, 31 Mati 2025, seia o’o i le Aso Lua, 29 Aperila 2025, ona o le tulaga fa’aletonu o le ‘eletise sa i ai le motu o Upolu. Na amata fa’asoasoa le ‘eletise mai i le Aso Gafua, 10 Fepuari e o’o atu i le Aso To’ana’i, 19 Aperila 2025. Sa fa’atino galuega a le Komiti o Ofisa o Fa’alavelave Tutupu Fa’afuase’i e fa’agasolo ai le tali atu o le Mālō i a’afiaga o ‘āiga ma tagata ta’ito’atasi ona o le ‘eletise. Saunoa le ta’ita’i o le atunuu Laaulialemalietoa Leuatea Polataivao Fosi Schmidt i le feiloaiga ma tusitala i le vaiaso lenei, “E pei ona faasilasila atu i le taimi ua sola, e tuu mai le tulaga o le laulautetele o le tinoitupe e manaomia mo lenei faamoemoe e le i lalo ifo o le $8miliona tala. “Peitai o le vailiiliga a le Matagaluega o loo nafa ma le faamoemoe o lea ua faamuamua mai ai, e 395 aiga e aofia ai ma nai pisinisi o taui mo televise, pusaaisa, ma mea uma sa faaletonu. “Ae o loo faagasolo pea aiaiga ma tulaga uma masani ina ia mafai ai ona tauamiotonuina lea faasoa ina ia aua nei faaaogaina o se mea ua fai ai ni fefaatauaiga poo ni fesuiaiga i mea ini mea e lei aafia talu le taimi o le faaletonu o le eletise.” Ae na faailoa e le Taitaifono o le Komiti o Faalavelave Faafuase’i o Lealaisalanoa Frances Reupena e silia ma le 500 pepa talosaga na tuu atu i le Ofisa Tutotonu mo Fa’alavelave Tutupu Fa’afuase’i. Saunoa le alii palemia e 395 le aofai o aiga faapea ma pisinisi o le a maua faamanuiaga mai lea vaegaetupe. “O le Komiti Galulue sa nafa ma le iloiloga o tusi talosaga e aofia ai le Matāgaluega o Galuega Tetele o le Mālō, Matāgaluega o Tupe, Matāgaluega o Puna’oa Fa’alenatura ma Si’osi’omaga, Matāgaluega o Tinā ma Tama’itai ma Agafeso’ota’i, Pulega o le Malosi’aga Tau Eletise.