$809,500 le Fesoasoani a le Malo mo le Taligamalo a Samoa mo le Ipu o le Lalolagi

2026-02-07 - 06:59

E $809,500 LE FESOASOANI A LE MĀLŌ MO TAPENAGA O LE TALIGĀMĀLŌ A SAMOA I LE IPU O LE LALOLAGI I LE SI’ISI’I U’AMEA MAMAFA. Tusia: Pesetā Tusiga Taofiga. E 78 atunu’u o le lalolagi, ma e tusa lea ma le silia i le 600 tagata ta’a’alo, ma i latou o le ā fa’atinoina ta’aloga [officials] e 200 o le ā malaga mai i Samoa i le Ta’amilosaga Tele o le Ipu o le Lalolagi mo le Si’isi’i U’amea Mamafa 2026 (Weightlifting World Cup 2026). O lea Ta’amilosaga Fa’avāomālō, o le ā talimālō ai Samoa amata atu i le Aso To’ana’i, 25 Aperila 2026 se’ia tauāluga i le Aso Lulu, 6 Me 2026. E lē māmā i le Kapeneta le talimālō ai o Samoa i lenei Ta’amilosaga Fa’avāomālō, aemaise ai o le Fa’agatama lenei, ua loa tausaga o fa’aeaina ai Samoa e ala i pine auro, pine siliva ma pine apamemea e maua mai e fanau o lo’o tausiniō i lea ta’aloga i so’o se fa’alāgāmaea. O le isi itu tāua o lenei taligāmālō, o le ā fesoasoani i le tamāo’āiga o le atunu’u, e ala i pisinisi i so’o se auaunaga, auā o le ā tumutumu i tagata ta’a’alo, o i latou e fa’atinoa ta’aloga aemaise o ‘āiga ma turisi mai isi atunu’u, o le ā afifio mai e molimauina tauālumaga o lea ta’amilosaga tele. Saunoa le afioga i le Palemia, Susuga i le La’aulialemalietoa Leuatea Polāta’ivao Fosi Schmidt e fa’apea; “E maoa’e le atina’e o le ta’aloga lenei i le atunu’u. Lea ua fa’atūina ai le Nofoaga Tutotonu o lenei Itulagi o le Pasefika mo Si’isi’i U’amea Mamafa [Oceania Weightlifting Institute] ma ua solo mai i ai ‘au si’isi’i mai i lenei Itulagi e koleleni ai i Tuana’imato.. “O se taimi muamua fo’i lenei i le tala fa’asolopito o lenei fa’agatama, o le ā talimālō ai se atunu’u o le Pasefika i le Ipu o le Lalolagi i le Si’isi’i U’amea Mamafa. “E fa’afetaia ai le Peresetene o le Asosi ‘Au Si’isi’i U’amea Mamafa a Samoa, iā Tuaopepe Jerry Wallwork, le Pulega ma Faiā’oga o le tatou ‘Au Si’isi’i i le sa’ilimālō i lenei ta’aloga. Aemaise lava i alo o le atunu’u o lo’o ta’a’alo ma tausiniō ma maua mai a tatou pine i tauvaga ‘ese’ese o lo’o tauvā ai. “O le fa’amalosi’au a le tatou Mālō, ia matuā tu’u i ai le tatou faimea sili i le tatou taligāmālō, aemaise lava i le tapenaina lelei o le tatou ‘au ta’a’alo, ina ia tele ni a tatou pine auro i lea tauvaga.” Ata Pu’eina: Leaosā Fa’aifo Fa’aifo.