Asiasiga Fa’apitoa A Le Palemia I Le To’ese I Tanumalala

2026-02-09 - 08:49

E le itiiti le fa’atāua a le afioga i le Palemia, Susuga i le La’aulialemalietoa Leuatea Polāta’ivao Fosi Schmidt fa’apea le Faigāmālō, i le saogālēmū o nofoaga o lo’o nofosala ma taofia ai nisi o le mamalu o le atunu’u ua ta’u salaina, ma o se tasi lea o mafua’aga autū o lana asiasiga fa’apitoa i le Aso To’ana’i ua mavae atu. Ata Pu’eina: Leaosā Fa’aifo Fa’aifo E lē nātia nisi o fa’alavelave fa’afuase’i sa tula’i mai i le to’ese i Tanumalala, ma ua fesiligia ai le saogālēmū o lea nofoaga ma o le o’o ai o le Palemia i lea To’ese, e fia silafia tonu nisi o vaega o lo’o mana’omia vave ona toe fa’aleleia auā le malu puipuia o nofoaga fa’apitoa i le to’ese o lo’o taofia ai se tasi o lo’o fa’atali lona fa’amasinoga. Ata Pu’eina: Leaosā Fa’aifo Fa’aifo O se tasi o itu tāua o lenei asiasiga, le maua ai o le avanoa o le Palemia fa’apea le Minisitā Lagolago o le Matāgaluega o Leoleo, Falepuipui ma le Ola Toe Fuatā’ina iā Vui Iiga Sione Iiga, e fa’afofoga ai i folasaga manino mai le Ofisa o le To’ese i Tanumalala, e ala i ana fuafuaga mamao mo le malu puipuia o lea auaunaga mai pagotā sosola. Na foa’i ai fo’i ma le fa’aaloalo a le afioga i le Ta’ita’i o le Mālō, Susuga i le La’aulialemalietoa Leuatea Polāta’ivao Fosi Schmidt e ala i taumafa ‘ese’ese mo le To’ese i Tanumalala, e fesoasoani ai i le tausiga o i latou o lo’o nofo sala i lea Falepuipui.