E 3 Faalavelave e Aafia ai Soifua na Lipotia atu i Leoleo

2026-01-28 - 18:55

E tolu ni faalavelave tugā na lipotia atu, ma o loo faia iai suesuega a leoleo. O nei faalavelave e aofia ai se alii mai le atunuu o Saina sa maua atu ua maliu i lona potu, o se tama e 43 tausaga o loo leiloa i le sami mai fagotaga, faapea se tamaitai sa taofia i lalo o le vaavaaiga a leoleo i Tanumalala. O faalavelave e lua ua matuinoa ai le maliu, o loo faaauau iai suesuega a leoleo, ae o le tamā o lo’o tau sailia, e toe tasi le aso atofaina mo le galuega a leoleo ma le FESA (search and rescue). Faalavelave Muamua: I le Aso 23 o Ianuari 2026, na lipotia mai ai le maliu o se alii tagatanuu Saina e 46 tausaga le matua. O lenei alii na maua atu ua maliu i le mea o loo faigaluega ai i se fale pisinisi i Vaitele. “Na maua atu o ia ua maliu i se potu i le nofoaga o loo faatino ai lana galuega..” “I suesuega muamua a leoleo, e lei mafai ona faamaonia o se solitulafono na aafia ai lona soifua. Sa iloiloina foi ata o le CCTV faapea ma molimau sa iai.” Faalavelave Lona Lua: O se tamā e 43 tausaga le matua mai Tiavea ma Samusu sa agai atu ma isi e toatolu e fagota i le po o le Aso Faraile, 23 o Ianuari 2026. Saunoa le Sui Komesina o leoleo, na faalavelaveina le fagotaga i timuga mamafa ma galu tetele. Na mafai lā ona toe fo’i mai ma faasaoina le toatolu, ae e lei fo’i mai le tamā e toatasi. Ua 4 nei aso o le galuega laveai sa galulue faatasi ai Leoleo ma le FESA. Sa iai foi ma le au aau loloto (divers) i sailiga. “Peitai e oo mai i le taimi nei e lei faamanuiaina.” O loo faaauau pea suesuega ma sailiga, ae a siliga loa, ona toe fai lea o se isi faaiuga pe faaauau pea. “I le tulaga loulouā o le tau, ua avatu ai se lapataiga i le au fagota i lenei vaitau.. Saunoa Leiataua, e malamalama o loo faatinoina galuega mo le sailiga o meataumafa mo aiga, ae ao lava ona siaki muamua le tau mo le saogalemu. Maliu o Papalii Sia O le tamaitai ia Papalii Sia Figiel sa maliu ao taofia ai i lalo o le vaavaaiga a leoleo i le falepuipui i Tanumalala e tālia ai le iuga o lana faamasinoga. “O le taeao o le Aso Gafua, i le va o le itula e 6 ma le 7, na logoina ai le Komesina e le aufaigaluega, ua maliu lea tamaitai..” Saunoa Leiataua, na ave o ia i le falemai i Faleolo ma faamaonia ai lona maliu. O Papali’i sa taofia o ia i le vaega o tamaitai, ma sa nofo toatasi i lona potu mo lona saogalemu, faapea le saogalemu o isi tamaitai o loo tāofia. Sa lata ane lona potu i le isi potu o loo iai tamaitai e toalima. Saunoa le SuiKomesina, “I suesuega muamua, e lei maua se faamaoniga o se solitulafono na mafua ai lona maliu.” Ua poloaiina se taotoga faapitoa, ma o loo i lalo pea le tino maliu i le vaavaaiga a leoleo e tusa ai ma tulafono. Na faai’u le saunoaga a le Komesina e faafetaia le lagolago a le atunuu, aemaise le Minisita o Leoleo ma le Afioga i le Palemia, i le lagolago malosi i galuega a leoleo, e le gata i le tetee atu i fualaau faasāina, ae faapea foi le tausisia ma le faamalosia o tulafono uma.