E $30,000 ma le $15,000 sala ua tuuina atu i aiga o Leauvaa na molia e leoleo i fualaau faasaina

2026-02-08 - 21:59

E toalua aiga o Leauvaa na tuuina atu iai faasalaga a le afioaga ina ua agiga mai le igoa o le afioaga i luga o upega tafailagi i osofaiga a le Matagaluega o Leoleo i soligatulafono tau fualaau faasaina. E $15,000 le sala na tuuina atu i se tasi o aiga, ae $30,000 le sala a le aiga na aafia muamua fo’i i osofaiga a leoleo ma faasala ai e le nu’u, ae o lea ua toe tula’i mai ai fo’i le faafitauli. Sa mafai ona totogiina atu le $15,000 o le sala a se tasi o aiga nei, ae o le isi o loo tuuavanoa iai le saofaiga a Alii ma Faipule. Fonotaga a Alii ma Faipule Leauvaa, Aso Toanai 7 Fepuari 2026. O le faaiuga o le vaiaso na te’a nei na faatautaia ai se fonotaga a le afioaga e faatino ai aulape ua maea ona faataatitia mo faasalaga a le afioaga, mo soo se tagata e maua o aafia i fualaau faasaina. Sa auai atu iai matai o aiga ua aafia o latou tagata i osofaiga a leoleo, e latou se faafesagai ma soalaupule ma Alii ma Faipule o le afioaga e tusa ai ma tu ma aga o faiganuu Samoa. Saunoa se tasi o matai tāua ma o le fa’iupu foi o le afioaga iā Tevaga Vailua Lio, o loo faatino le pitolaau a Tuala ma Salā, Tevaga ma Vaifale e ala i le aulape ma alafua ua faataatitia e faatatau i mataupu faapenei. “E lē tuumāmāina e le saofaiga a Alii ma Faipule o le afioaga o Leauvaa le agiga mai o le igoa o le afioaga i luga o upega tafailagi i taimi o osofaiga a le Matagaluega o Leoleo, ae maise o le maua ai o nisi o le afioaga, o loo aafia i fualaau faasaina. ” I osofaiga a le Matagaluega o Leoleo sa faatino mai lava ia Tesema 2025 se’ia oo mai ia Ianuari 2026, e to’alima i latou sa tāofia e leoleo, ma tuuina mai o latou ata i luga o upegatafailagi, ma faailoa mai ai, o Leauvaa o latou nuʻu. E lua aiga e omai ai lenei to’alima, ma o lo’o aafia uma i faasalaga a le afioaga, lea sa totogiina ai le $15,000 o le sala a se tasi o aiga i le Aso Toanai ua mavae. Ae peitai o le isi aiga, e $30,000 le sala na tu’uina atu iai, ona e lē o se taimi muamua lenei ua aafia ai nisi o lenei aiga i soligatulafono tau fualaau faasaina. E le’i mafai e lena aiga ona tu’uina atu le sala tupe e $30,000 tala, ma o le Aso Toanai nei ua toe tuu avanoa atu iai le saofaiga a Alii ma Faipule. Saunoa Tevaga Vailua Lio, e lagolagoina tele e Alii ma Faipule o Leauvaa ia taumafaiga a le Malo ina ia tafiesea fualaau faasaina mai le atunuu. Greenology is Samoa’s leading provider of ICT Solutions! Saunoa Tevaga, “Ua faatino le pitolaau a le afioaga o Leauvaa e lagolago ai taumafaiga a le Matagaluega o Leoleo ma le Malo i le tafiesea o fualaau faasaina mai le atunuu..” “O le naunautaiga o le afioaga, ia silasila mai le Malo ma le atunuu, e lē o nofonofo Alii ma Faipule o le afioaga..” Saunoa Tevaga e le o se faiga fou i totonu o le afioaga le faasala o i latou o loo solia le tulafono o se faiga ua leva ona faatino i totonu o le afioaga. E le’o iai ni polokalame toefuataina a le afioaga o faatino i mataupu faapenei, peitai, ua faaalia e Tevaga o se tasi lea o vaega o loo silasila iai Alii ma Faipule ina ia mafai ona faatino ni polokalame i lalo o le Fono Faavae. “E lagolago tele e le nuu lenei taumafaiga a le malo ia tafi ese fualaau faasaina mai le aafia o tagata, ma o le naunautaiga foi lea a le nuu lenei, ia aua nei aafia ona tupulaga i fualaau faasaina.” February at Taumeasina Island Resort! New in Stock!