E le’i logoina le Sui Komesina i le Galuega na Afua ai ona Maliu le alii Satini

2026-02-18 - 12:37

Ua faailo e le afioga i le Palemia o ia foi o le Minisita o le Matagaluega o Leoleo le Susuga i le Laaulialemalietoa Polataivao Fosi Schmidt, e le’i logoina le Sui Komesina e i latou sa agai i le vaa lea na maliu ai Afutoto Evile Paulo Ekueni. O le saunoaga lea a le afioga i le Palemia ina ua fesiligia e tusitala poo le a se ripoti a le Sui Komesina. “O le taimi a na tupu ai le faalavelave na valaau mai ai le afioga i le Komesina ia te a’u ua tupu le faalavelave.. “Ou te taofi o se taimi ua oo mai se lipoti aloaia a le Komesina o leoleo.” Saunoa Laaulialemalietoa sa tele vaega sa ia fesiligia ai le Sui Komesina ina ua faailoa atu ia te ia le faalavelave. “Na pau a le fesili sa ou fesili ai i le Komesina pe sa ia iloaina le operation lea.. “O le tali a le Komesina e le’i logoina ia.” “Fesili lona lua – pe sa fai ni ofu faaola ma mea uma e moomia.. “O le tali a le Komesina, o le tala a le na la talanoa lea sa feausi mai tai – e leai.” “O le isi fesili – O le a le mafuaaga na ala ai ona ō, pe sa logo le Komesina.. “O le tali.. E leai.” O loo faagasolo pea i le taimi nei suesuega a le Matagaluega i lenei mataupu. Ata Pu’eina: Grace Pouoa. “O loo i aao o leoleo i le taimi nei suesuega atoa lava poo le a le mea na mafua ai ona alu le operation lea i le sami, aemaise, faatoa uma atu lava le apoapoaiga a leoleo i tagata lautele – e aua nei soona o tele o lea e faaletonu le tau..” “Ae ua ou manatu, ona ua uma le soifua o le alii Malu o le Malo, ae ua faatonu le Sui Komesina e tapena lelei le lipoti, ona aumai lea poo le a le mafuaaga na tupu ai lea faalavelave.” O le talitonuga o le Taitai o le Malo, sa le tatau ona tupu lenei faalavelave pe a fua i le tomai ma agavaa o i latou sa agai i le vaa. “O lou talitonuga o alii leoleo ma auvaa seila marine faapea maritime leoleo – o tagata ua aoaoina lelei e le tatau ona iai se tulaga faapea o le tau fesiligia o tomai, ma agavaa i luga o le sami.” “O latou nei lea e i luga o le Nafanua they are well trained people, ma e le tatau ona tupu se mea faapea ia i latou.. “Peitai ua tupu le faalavelave ma ua maliu foi le sa avea le vaa. O lona uiga o latou uma sa aafia, ia lea e faasolo ia tulaga i suesuega ou te iloa a maua mai ua tatou maua le tala sao lava.” Saunoa Laaulialemalietoa o le isi vaega sa ia faatonuina ia silasila i mea pueata o loo i le ofisa ina ia mautinoa vaega uma o le suesuega. “Ua uma foi ona ou faatonua o i latou uma lava i le marine i Matautu, vaai uma cameras e siaki uma poo le a le saoga o le mea na tupu.. “Ona e tatau ona iai cameras e surround ai le fale i le taimi na alu ese ai le vaa ma le taimi na omai ai, ae sei faasolo pea suesuega a leoleo.”