E lei logoina le sui komesina o leoleo i le galuega sa faatino e leoleo na afua ai ona maliu le alii satini o le vaega o gataifale

2026-02-17 - 00:40

Ua faailo e le afioga i le palemia o ia foi o le Minisita o le Matagaluega o Leoleo o Laaulialemalietoa Polataivao Fosi Schmidt e lei logoa e i latou sa agai i le vaa lea na faafoe e le ua maliu le alii leoleo satini o le gataifale o Afutoto Evile Paulo Ekueni le sui komesina o le matagaluega. O le saunoaga a le afioga i le palemia ina ua fesiligia e tusitala poo le a se ripoti a le sui komesina. “O le taimi a na tupu ai le faalavelave na valaau mai ai le afioga i le komesina ia te au ua tupu le faalavelave ma o inā lea e taoto iai le suesuega i le taimi lenei. Ou te taofi o se taimi ua oo mai se lipoti aloaia a le komesina o leoleo.” Saunoa le Laaulialemalietoa sa tele vaega sa ia fesiligia ai le sui komesina ina ua faailoa atu ia te ia le faalavelave. “Na pau a le fesili sa ou fesili ai i le komesina pe sa ia iloaina le operation lea o le tali a le komesina e lei logoina ia.” “Fesili lona lua pe sa fai ni ofu faaola ma mea uma e moomia o le tali a le komesina o le tala a le na la talanoa lea sa feausi mai tai e leai.” “O lesi fesili o le a le mafuaaga na ala ai ona o, pe sa logo le komesina o le tali e leai.” O le taimi nei faaalia e le palemia o loo faagasolo suesuega a le matagaluega i le mataupu. Ata Pu’eina: Staff Reporter “O loo i aao o leoleo i le taimi nei suesuega atoa lava poo le a le mea na mafua ona alu le operation lea i le sami aemaise faatoa uma atu lava le apoapoaiga a leoleo i tagata lautele e aua nei soona o tele o lea e faaletonu le tau. “Ae ua ou manatu, ona ua uma le soifua o le alii malu o le malo, ae ua faatonu le sui komesina e tapena lelei le lipoti ona amai lea poo le a le mafuaaga na tupu ai lea faalavelave.” O le talitonuga o le taitai o le malo sa le tatau ona tupu le faalavelave le a fua i le tomai ma agavaa o i latou sa agai i le vaa. “O lou talitonuga o alii leoleo ma auvaa seila marine faapea maritime leoleo o tagata ua aoaoina lelei e le tatau ona iai se tulaga faapea o le tau fesiligia o tomai, agavaa, luga o le sami.” “O latou nei lea i luga o le Nafanua they are well trained people, ma e le tatau ona tupu se mea faapea ia latou, peitai ua tupu le faalavelave ma ua maliu foi le sa avea le vaa o lona uiga o latou uma sa aafia, ia lea e faasolo ia tulaga i suesuega ou te iloa a maua mai ua tatou maua le tala sao lava.” Saunoa Laaulialemalietoa o le isi vaega sa ia faatonuina ia silasila i mea pueata o loo i le ofisa ina ia mautinoa vaega uma o le suesuega. “Ua uma foi ona ou faatonua o tai uma lava i le marine i Matautu vaai uma cameras e siaki uma poo le a le saoga o le mea na tupu ona e tatau ona iai cameras e surround ai le fale i le taimi na alu ese ai le vaa ma le taimi na omai ai, ae sei faasolo pea suesuega a leoleo.”