Faafetaia e le Palemia le Tapua’iga – i Samoa nei ma Atunuu i Fafo

2026-03-27 - 08:34

O le vi’iga ma le fa’afetai i le Atua, e lē fa’aitiitia, ona o lona alofa tausi, ma lona agalelei, ua i’u manuia ai le fa’amasinoga e pei ona feagai ai ma le Ta’ita’i o le Mālō, Susuga i le La’aulialemalietoa Leuatea Polāta’ivao Fosi Schmidt. I le lauina o le faaiuga a le Fa’amasino Sinia o le Fa’amasinoga Fa’aitumālō i le asō, le Susuga iā Talasa Atoa-Sa’aga, sa ia fa’ailoa manino ai, e mamā le afioga i le Palemia ma tu’uā’iga sa faasaga ia te ia. O le Aso 3 Ianuari 2025 sa molia ai Laaulialemalietoa ao fai o ia ma Minisita o Faatoaga o Faigafaiva. Sa tumau pea lona lē ioeina o moliaga uma faasaga ia te ia (maintained his innocence). Ae sa avea foi nei moliaga ma mafuaaga o se vevesiga i le lotoifale a le FAST, ma agai atu ai lava i le faigapalota (snap election) ia Aukuso 2025, lea na tulai mai ai loa Laaulialemalietoa e fai ma Palemia o Samoa. Na va’aia le tumutumu o le mamalu o le atunu’u ae maise o le Kapeneta atoa i le Ofisa o le Fa’amasinoga i Mulinuu i le tālia ai o le i’uga o lenei fa’amasinoga, ua taligā auā o le faatolu ai lea ona tolopo le lauina. Ina ua maea le lauina o le iuga o le Faamasinoga na saunoa ai le Palemia e momoli le faafetai i le tapuaiga a Samoa, i le aiga Sā Levi ae maise le mamalu o le atunuu i Samoa nei ma atunuu i fafo. “Ia tatou tulimatai i Le Atua ma lona finagalo.. Pau lava la’u talosaga i le tatou aiga, afai ua tatou maua le malō i le asō, o lalo. O faataitaiga na a Le Atua..” “Ia tou alofagia la’u tau alaga pea.. Aua le mana’o i le lauamanu, ao le faamuli o atu. Ia outou silasilaga i le upega, a lea e tau su’i atu nei.. le atunuu, ina ia mapo aiga, ina ia mapo nuu, ma ia mapo le Ekalesia.. aua le tatou va faafeagai ai..” “O le mea sili, o lea ua mamā a’u ma nei mea uma, ae o le a ou toe faasaga e taitai le Malō.. faafetai tele i la outou tapuaiga..” Sa faafetaia foi e le Palemia le Sui Palemia ia Toelupe ma le Kapeneta, sa auai uma ai i le fale faamasino. “Malo le onosai. Ua uma ona ou fai atu ia te outou, tapena, o le ā le mea e tupu ia te a’u i le taeao lenei, tapena outou e Le Atua e faaauau le tatou Malo.. Ae o se fiafiaga tele ua matauina i le tapuaiga a le atunu’u, ona ua i’u manuia ma ua fa’amamāina fo’i tu’uā’iga fa’asaga i le afioga i le Ta’ita’i o le Mālō. E pei ona folasia e le Faamasinoga, sa taumafai le Palemia e fesoasoni i suesuega a leoleo, ae le o se solitulafono. Na momoli le fa’afetai fa’apitoa a le afioga i le Palemia le susuga i le La’aulialemalietoa, i le tapuā’iga a Samoa aoao, i le tapuā’iga leoleoa ma le nofo tatalo a’o fa’atali ai le i’uga o lenei fa’amasinoga. Na ia fa’afetaia fo’i le pa’ia i le ‘āiga Fa’amasino, ona o le galuega fītā, ma le fa’afoefoeina o lenei matā’upu ua tini taunu’u ai i manū. National Bank of Samoa Customer Satisfaction Survey! “TELL us about your experience with NBS Digital & In Branch Services” – Fill out form