Faalaugatasia le atunuu atoa i se fesoasoani $32,250,000 e tapena ai le toe fo’i o le fanau aoga

2026-01-26 - 04:11

E $32,250,000 o le a tufatufaina i tagata uma o le atunu’u i se tapenaga a le Malo mo le toe a’e ai o aoga i lenei tausaga. Saunoa le afioga i le Palemia, Hon Laaulialemalietoa Leuatea Polataivao Fosi Schmidt, i le fono faaletausaga a faiaoga, o lenei faamoemoe o se faiga fou a le Malo e fesoasoani ai mo fuafuaga a aiga ae maise matua i le amataga o tausaga taitasi. O lenei faiga fou o le a laugatasia ai le faamanuiaga mo tagatanuu uma ae lē na o le au fai lafoga i le NPF. “Everybody counts. E leai se isi e tuua. O le Atunuu atoa..” Saunoa le Palemia, sa fetuuna‘i anapo i le fono a le Kapeneta le taufaatulagaina o lenei fesoasoani e amata atu i le tausaga nei, ma fesoasoani ai i le “back to school“. Saunoa le Palemia, o lenei faamanuiaga o le a totogiina atu mo tagatanuu uma o Samoa, e tusa lea ma le 215,000. Ma ua faatulaga ai le fuainumera ina ia laugatasia ai le tufatufaina o le $32,350,000. 215,000 x $150 = $32,250,000 “Oi latou ia o le a faamatuu atu iai le fesoasoani lenei na tapena ma pasia aloaia e le tatou Kapeneta anapo. Saunoa le Palemia, sa tau fetuunai lava pe vaevae i masina e tolu pe fa lenei faamanuiaga, peitai, na toe silasila le Malo, o le amataga o le tausaga, o le taimi lea e pito sili ona manaomia ai le fesoasoani lenei. O lenei faamanuiaga o le a tufaina ma faamatuu atu e Fono Faavae a itumalo taitasi. Saunoa Laaulialemalietoa, “O lona uiga, e tatau i tatou Fono Faavae uma ona siaki lelei le aofaiga o matua faapea fanau ma tagata, ina ia sa’o ma faamaonia lelei le tulaga lea ua tatou tapena ai..” Saunoa le Palemia, e lē tatau ona tula’i mai ni tulaga na oo iai tufaga o tupe muamua, ua iai le tagata faaopoopo oe totogi atu, ae ua feoti. Saunoa Laaulialemalietoa, “ua lava le faatuatuaga i le pule mamalu a Alii ma Faipule ma Taitaifono a tatou Komiti Fono Fa’avae, latou te tapenaina le faamoemoe lenei mo le atunuu atoa. O aiga taitasi, e totogi atu mo tagata uma o le aiga lenei faamanuiaga. “O le a maua lenei fesoasoani e tagata uma e oo lava i latou e iai manaoga tumau, o tagata matutua seia oo lava i pepe faatoa fanau mai.” O le a faamatuu atu e lenei fesoasoani a le Malo ae le’i uma le masini o Fepuari. Saunoa le Palemia, e iai foi le tului faaletausaga (dividend) mo le au faisaofaga a le NPF. “E ai se taimi ona faasilasila foi lea e le Minisita o Tupe lena foi fesoasoani.”