Sauniga Fa’alemālō o le Afioga iā Hon. Letiu Polāta’ivao Tamatoa Penaia

2026-02-24 - 12:46

O lenei tamāli’i o se tasi o toa o le atunu’u ua loa lana tautua iā Samoa i ona ‘upufai e ala i le tofi Faipule a’o le avea fo’i ma Minisitā o le Kapeneta. Mo le silafia, o le tu’umālō ai o le afioga iā Hon. Letiu Polāta’ivao Tamatoa Penaia i le Aso 01 Fepuari 2026, na faia ai le fa’aaloalo fa’ai’u a le Mālō e amanaia ai lana tautua matavela i le atunu’u ma le Mālō, i ona toe sauniga fa’alemālō ananafi i le Malumalu Tapua’i a le Ekalesia Metotisi i Matafele. O lona Sauniga Fa’alemālō, na fataina ai e Malu o le Mālō lona pusa maliu, ufita’i lona pusa maliu i le tagāvai o Samoa, ma momoli aloā’ia le tagāvai i lona ‘āiga, e fai ma pine fa’amau o le mauāluga o le fa’aeaea ma le amanaia e Samoa atoa, o lona sao i nei tausaga e tele. O Letiu, na ulua’i ofi i le Palemene i le tausaga 1976 ma tofia ai e avea ma Minisitā o le Matāgaluega o Galuega Tetele se’ia o’o atu i le 1979. Toe filifilia e avea ma Minisitā o Atina’e Tau Tamāo’āiga, Fa’amaumauga, Fefa’atauā’iga, Faigāfaiva ma le Vaomatua i le 1979 i le 1982. Na avea ma Faipule o le Palemene mo le Itumālō o Aleipata Itupā i Lalo mai le 1988 i le 1995 ae na tofia fo’i ma Ta’ita’ifono o le Komiti Fa’apalemene mai le 1991 i le 1995. Na fa’ailoa le agaga fa’afetai o le afioga i le Palemia, Susuga i le La’aulialemalietoa Leuatea Polātaivao Fosi Schmidt i lana molimau e fai ma fofoga o le Mālō ma le atunu’u atoa, ona o le tautua lē fa’atuāoia o lenei Ta’ita’i iloga. O mo’omo’oga alofa ma fa’amafanafanaga mai le Ta’ita’i o le Mālō, ina ia maua e si ona ‘āiga loto fa’avauvau ma le fa’anoanoa, le fa’amafanafanaga sili mai lona Agaga Pa’ia a’o feagai ai ma lenei vaitau faigatā i le motusia fa’afuase’i ai o le mafutaga pelē ma le tamā ona o le malaga a le maliu ma le oti. O lenei sauniga fa’apitoa, na auai ai Lana Afioga i le Ao Mamalu o le Mālō, le Palemia ma lona Faletua fa’apea afioga i Minisitā o le Kapeneta, latou te molimauina toe oliolisaga tumau o le tamā iā Letiu.