Silia i le 100 ua Fa’ae’e i ai Pine Mamalu ma Fa’ailoga Tauāloa a Samoa Ona o le Latou Tautua Matavela

2026-03-25 - 00:54

I le mua’i amataina o le Sauniga Fa’aleMālō mo Tulaga Mamalu ma Fa’ailoga Tauāloa a Samoa mai le tausaga e 1993, o le 7 ai nei o ia Sauniga Fa’aleMālō ua fa’atinoina. Ma ua fa’amauina, e silia i le 100 tagatānu’u Samoa ua fa’ae’eina atu ai ia Pine Tauāloa, o le fa’amoemoe mauāluga o le Mālō e tauala atu i lea Sauniga Fa’aleMālō, ia ‘ave le fa’aaloalo mauāluga i ona tagata, e amanaia ai lo latou sao tāua i le tele o tausaga i so’o se matātā ma so’o se vaega mā’oti o le tamāo’āiga o Samoa. E amanaia ai fo’i i latou sa ofoina le soifua e lavea’i ai nisi tagata i ni galuega lavea’i, fa’apea Sui o le Mālō ma Sui Tama’ita’i ua molimauina lo latou sao tāua i le lumana’i manuia o afio’aga. O lenei galuega o lo’o lima ta’ita’iina i le Tulafono o Tulaga Mamalu ma Fa’ailoga Tauāloa 1999 ae na toe faia i ai suiga ma avea ai o se Tulafono Teuteu i le tausaga 2018. O Sui o le Komiti o Tulaga Mamalu ma Fa’ailoga Tauāloa, e to’a 6 i latou o lo’o filifilia ai, e aofia ai; i. Ofisa Sili, Matāgaluega a le Palemia ma le Kapeneta – Ta’ita’ifono ii. Ofisa Sili, Matāgaluega o Tupe iii. Ofisa Sili, Matāgaluega o Tinā ma Tama’ita’i, Atina’e o Nu’u ma Agafeso’ota’i iv. Sui o Ekalesia v. Sui o Ali’i ma Tulafale vi. Sui o le Vaega Tumā’oti O matāfaioi tau’ave a lenei Komiti Fa’apitoa, e aofia ai le iloiloina o tagata mai i nofoaga uma o Samoa ma fafo, o i latou ia e ono agava’a mo fa’ailoga po’o fa’ailoga tauāloa ma tu’uina atu fautuaga i le Kapeneta mo le tu’uina atu o fa’ailoga i so’o se tasi o ia tagata e pei ona ua ia manatu, ua talafeagai i ai se fa’ailoga. O le fa’aauau pea ona iloiloina le agava’a o i latou ua uma ona tu’uina atu i ai fa’ailoga pe ā talafeagai ai po’o mo le fa’amoemoe ina ia fautuaina ai le Kapeneta mo le tu’uina atu i ai o nisi fa’ailoga tau Poloā’iga mauāluluga atu po’o isi fa’ailoga po’o le ā lava le tulaga o le a i ai. Fa’atasi ai ma le tapenaina o fautuaga tusitusia mo le tu’uina atu i le Kapeneta e pei ona aiaia. E 13 Itu’āiga Pine Tauāloa, ‘ese’ese i lalo o le Tulafono, e mafai ona fa’ae’eina atu i ‘ai latou e filifilia ma fa’amanuiaina mo lea Sauniga Tauāloa. O nei pine tauāloa e aofia ai; i. Poloā’iga Tutasi a Samoa ii. Poloā’iga Sili a Samoa iii. Poloā’iga a Samoa iv. Poloā’iga Fa’apa’āga a Samoa v. Poloā’iga mo Galuega Maoa’e ma le Ta’uleleia vi. Ofisa o le Poloā’iga a Samoa vii. Sui o le Poloā’iga a Samoa viii. Poloā’iga a le Ao o le Mālō mo le Tautua ix. Pine a le Ao o le Mālō mo le Tautua x. Koluse a Malietoa xi. Koluse a Samoa xii. Pine a le Ao o le Mālō mo le Loto Toa xiii. Pine Tauāloa a Samoa. O lo’o tatala le avanoa i le taimi nei, mo talosaga o nisi ua manatu le atunu’u, e talafeagai ma agava’a i ai nei Pine Tauāloa a le Mālō. E na’o le to’a 11 i latou na talosaga se’ia tapunia i lenei vaiaso, o le ala lea ua manatu ai le Komiti, ina ia toe tatala pea le avanoa mo le isi lua vaiaso, e talitali ai nisi o fia talosaga mo ia fa’ailoga tauāloa a Samoa.