Tatala Aloā’ia Le Fale Tele Teu ‘Oloa A Le Mālō I Atele

2026-02-03 - 01:28

Tusia: Taunuuga Toatasi O le tatala aloā’ia ai o le fale teu’oloa a le Mālō i Atele, o se atina’e mo le tapenaina o oloa mo le auina atu i atunu’u i fafo i le fa’amalu a le Matāgaluega o Fa’ato’aga ma Faigāfaiva. O le tau o le galuega e $4.4 Miliona ma e fitu masina sa fa’agasolo ai lea galuega. O le 75% o le fa’atupeina o lea galuega sa agalelei mai ai le Faletupe a le Lalolagi [World Bank] ma le Fa’alapotopotoga e Fesoasoani i Atina’e Tau Fa’ato’aga a le Lalolagi [I.F.A.D.], fa’atasi ai ma le sao o le tatou Mālō e 25% tauala mai i ana Tupe Fa’aagaga. Ata Pu’eina: Leaosā Fa’aifo Fa’aifo O lea galuega o se molimau i le tulaga o le mau fetu’una’i ma galuega atia’e fa’agasolo a le Mālō, ma le sa’ili tatau i avanoa mo le manuia lautele o le atunu’u. E le gata mo le au fai fa’ato’aga, a’o se sao i le galueā’ina o le tamāo’āiga o Samoa. O le Kamupanī a le King Construction lea sa fa’atinoa lea galuega e pei ona manumālō ai i tauofoga a le Mālō sa fai. Ata Pu’eina: Leaosā Fa’aifo Fa’aifo I le saunoaga autū a le afioga i le Palemia, Susuga i le La’aulialemalietoa Leuatea Polāta’ivao Fosi Schmidt, sa ia fa’amanino ai le tāua tele o lea atina’e. “O lenei fale teu ’oloa o se la’asaga tāua tele lea mo le unā’ia o atina’e tau fa’ato’aga i oloa auina atu i fafo, fa’atasi ai ma le silasila mamao a le tatou Mālō i auala e si’itia ai avanoa e mafai ai ona auina atu a tatou oloa tau fa’ato’aga mo maketi i atunu’u mamao. “O atina’e tau fa’ato’aga ua tatou talitonu o le poutū toa lea o le fa’amoemoe mo le atina’eina o le tatou atunu’u. “Samoa o se atunu’u e lauusiusi ana atina’e tau fa’ato’aga, ma o le tulaga lenā sa tatou i ai mai lava i le amataga. “Tatou te tua i le vao, tatou te tua i meatotō, tatou te tua i fanua, ma e leai ni a tatou minerale po’o ni a tatou oa fa’alēnatura. O le tatou talitonuga mai le amataga, o le tatou auivi autū lea o fa’ato’aga ma faigāfaiva e tua i ai le atina’eina o le atunu’u, ma e le’i alu ‘ese le mea lenā mai le amataga talu ona fa’avae Samoa. “O le ulua’i paketi a le Mālō i le tausaga e 1962, 75% o le fa’atupeina o le paketi lenā, e mai fa’ato’aga ma faigāfaiva. O inā tatou te iloa ai o le pine fa’amau mai le amataga, o le atoatoaga o le malosi’aga o Samoa, o ona lau’ele’ele tainane fua o fa’a’ele’eleaga ma faigāfaiva. “O lo’o manino ma mausalī ai le fa’amuamua i atina’e tau fa’ato’aga i so’o se vaega. O le silasila mamao a le tatou Mālō, a lelei si’itia tatou atina’e tau fa’ato’aga, o le ā lava taumafa i totonu o le atunu’u, unā’ia le soifua mālōlōina lelei o tatou tagata ma nu’u, si’itia le tupe maua mo ‘āiga, si’itia oloa tau fa’ato’aga auina atu i fafo ma oloa gaosi, fa’aitiitia le tatou ola fa’alagolago i oloa auina mai fafo, fa’atupula’ia pisinisi ‘ese’ese ma fa’ateleina galuega mo ā tatou fanau. Ata Pu’eina: Leaosā Fa’aifo Fa’aifo Saunoa fo’i le Afioga i le Palemia e fa’apea, o le taimi lenei ua mafuli le fa’alagolago o le atunu’u i oloa mai fafo aemaise lava i ‘a’ano o manu fasi. “Ou te pese pea i le pese lea e lē mafai ona ou taofiofi, leaga o le meatonu lava lenā lea tatou te i ai. “E 70 pusa oloa [containers] 40 futu i le masina lea tatou te taumamafa ai, fa’atusatusa i le ono i le fitu miliona moa atoatoa i le tausaga lea tatou te taumamafa ai, a’o oloa nei, o oloa na gaosi i le iva po’o le valu masina talu ai, ona tu’u ’aisa lea, auina mai Amerika ma aumai i Samoa, o se itu ua tatau ona tatou tilotilo lelei i ai, pe fa’amata o ī lea e ui mai ai fa’ama’i lē pipisi lea ua tele ai le kanesa i le atunu’u, tele le toto mauāluga, tele le ma’i fatu, tele le fa’amamā toto ma tele gasegase ua tatou maitauina i le taimi lenei. “O le fa’amoemoe autū, tatou ō e toe fai atina’e sa amata ai ona tatou faia, lea lava e tātālogo masefau ma o le polōketi lea e fa’amoemoe i ai le Mālō mo Itumālō uma e 51 a le atunu’u, o se tasi lea o Faiga Fa’avae autū ua lalago i ai le tatou Mālō e ō e una’i uma ai le toe fa’aleleia o fa’ato’aga uma e toe maua ai le toe totōina o mea’ai e tatau ona taumamafa ai le atunu’u mo le soifua mālōlōina lelei.” Sa tatala ai fo’i i lea fa’amoemoe ta’avale fasimanu fou e tolu a le Matāgaluega o Fa’ato’aga ma Faigāfaiva, mo le fa’amoemoe ia malu puipuia ma saogālēmū le fasiina o manu e auina atu mo maketi i atunu’u i fafo.