Teena e le Ofisa i Mulinuu se Talosaga e Taofia ai le Suafa Matai o Luxon

2026-03-23 - 02:14

Ua tuuina atu ai se tusi a le Ofisa o le Faamasinoga o Fanua ma Suafa e tauala atu i le Resitara e teena ai le faauluina o se talosaga e taofia ai le faaeeina o le suafa TuiSinaveMaUlumotootua i le Palemia o Niu Sila, Rt Hon Christopher Luxon. O le talosaga sa faauluina e le Susuga ia Feagaimaalii Bruce Toomalatai Utaileuo ma le Susuga i le Aloosina Toomalatai Feagaimaalii Fetaoa’i Lepili Toomalatai. Sa talosagaina e Feagaimaalii ma Aloosina le Ofisa o le Faamasinoga i Mulinuu, “ina ia soloia le Suafa Tuisinavemaulumotootua o APIA ma Matautu-Sa, na faaeeina i le Palemia o Niu Sila, Rt Hon. Christopher Luxon.” I le tali atu a le Ofisa o Faamasinoga, sa faasilasila atu ai le finagalo o le Resitara e faapea, e lē agavaa ona faauluina se talosaga i lenei mataupu, ona o le suafa matai sa faaeeina, o se suafa i tulaga mamalu taualoa poo le honorary title. E pei ona tusia i le tali a le Ofisa, “O le mataupu ua ta’ua i luga e pei ona tuuina mai ai la outou talosaga o le aso 17 Mati 2026, e lē agavaa se itu talosaga e faauluina ni talosaga i le faamasinoga.” Ua faamanino mai e le Ofisa, o le suafa matai na faaeeina i le Palemia o Niu Sila, sa faatinoina i tulaga mamalu taualoa ma aloa’ia a Samoa, ma e faatinoina ma ofoina atu e amana’ia ai tagatanuu mai fafo (Honorary Basis).” “O lenei suafa matai e le resitalaina i le Api Resitala o suafa matai a Samoa, ma e le faasalalauina foi i le Savali, ae na ona tuuina atu o le Tusipasi Taualoa o Suafa Matai (Honorary Matai Title Certificate), e aloaia ma amanaia ai le faaeeina o le suafa matai. “Ona o mafuaaga ua tuuina atu i luga, e failoa atu ai ma le faaaloalo tele, e Teena le faauluina o le talosaga e pei ona taulimaina e la tatou ofisa”. Sa sainia lea tusi e le afioga ia Leaumoana Tuumatavai Lasalo Salima, mo le Resitara. Farmer Joe: Fugalei, Vaitele, Ululoloa, Saleimoa. O le Aso Gafua sa faatino ai le faafotutupu a le Palemia o Niu Sila ina ua malaga mai mo faatalanoaga (bilateral meetings) ma le Palemia o Samoa, aua le atiinae manuia o atunuu e lua.