Toe Fa’aa’e Magele Sekati ae Fa’asala Tofilau Lino e le Afioaga o Iva

2026-02-14 - 01:30

Toe fa’aa’e Magele Sekati Fiaui e le afioaga o Iva, ae fa’asala Tofilau Lino Tofilau. O se faaiuga lena o se fonotaga faapitoa a le afioaga o Iva i Savaii na faatautaia i le aoauli o le Aso Faraile e pei ona molimauina e se tasi o matai na auai ai. Sa oo atu lē sa avea ma faipule o le itumalo ia Magele Sekati Fiaui, ma lana sala e $6,500 tala ma taliaina e Alii ma Faipule o le afioaga. “E $10,000 le sala, ae na o’o atu ma le $6500 ma taliaina e le nuu..” O le faatea ai o Magele, na afua mai i se faaiuga o le Faamasinoga Maualuga poo le Faamasinoga o Faigapalota (Electoral Court). O le faaiuga a le Faamasinoga, o le tufaina atu o tupe o le Poloketi Miliona e Magele i sui o le Itumalo, ae ua toe o nai aso le faigapalota, o se faiga e faatosina atu ai a latou palota. Peitai, e le’i faapea mai le Faamasinoga ua faaaoga sese pe gaoi (se’i tulou) e Magele se tupe o le poloketi; e pei ona tele ina fela’ua’i ai tala. O se finagalo la o le itumalo i lana fonotaga i le masina uaa te’a – ua faaaoga sese e Magele tupe o le Poloketi Miliona e faatino ai ana faatonisa. O lea sa faavae ai loa oe latou mau, e le toe taliaina Magele e avea ma Taitaifono o le Poloketi. O le o’o atu o Magele Sekati ma lana sala, ua magalo ai lana sala ma toe faaaeina. O le molimau mai le fono a le afioaga, ua finagalo le nuu e agai atu loa Magele e Taitaifono e tusa ai ma le tofiga a le faigamalo, ae faagasolo loa le Poloketi Miliona auā le manuia lautele o le Itumalo. “Ua toatele ua toe sui o latou mafaufau, ma manatu ua tatau loa ona toe tatala le ofisa o le Fonofaavae ma amata loa galuega a le poloketi..” Ae o le mataupu i lafoga sa faia e Tofilau Lino Tofilau e faasaga i le Palemia o Samoa i se feiloaiga a le HRPP i Petesa i le vaiaso ua mavae, lea na afua ai ona faasala e le itumalo Tofilau. “E 100 aumatua le sala, poo le $5000 tala.” Faailoa mai e se tasi o matai e na’o le $2000 tala na tuuina atu e Tofilau i le afioaga. “Sa alu atu ma le $2,000 tala. Ae i loo tuu iai le avanoa e toe faaatoa mai ai le seleni..” I le vaiaso lava fo’i lenei sa faasalalauina ai e le Palemia, le Susuga ia Laaulialemalietoa Leuatea Polataivao Fosi Schmidt, ua faaiugafonoina e le kapeneta le aveese o le itumalo o Faasaleleaga 2 mai le Polōketi Miliona. “Ua taofia nei, e lē toe iai se faamanuiaga mo le itumalo o Faasaleleaga numera 2” Na faailoa mai foi e molimau sa auai i lea fonotaga, o loo iai se fuafuaga a le afioaga o Iva, o le a faatino se faatoesega a le afioaga i le Alii Palemia ona o lafoga na faia e Tofilau. O nei lafoga ma le faamata’u e pei ona tā’ua e le Palemia, ua faaulu lana tagi i le Matagaluega o Leoleo. “O upu ua lalafo e foliga mai ua tau faamata’u a’u nei o le Tatai o le Malo..” “Ua uma ona ou ave le mataupu i lima o leoleo e faatino ai ala o le tulafono.” O loo tapena mo le Aso Gafua le agai mai o le Itumalo e faatino se faatoesega i le Palemia poo le Susuga i le Laaulialemalietoa, ona ua agiga i luga o upega tafailagi faamatalaga agai i le Palemia e se tasi o matai o le afioaga.