Tolopō le Faamatuu o le tai $150 tala se’ia mae’a Faigapalota Laiti

2026-02-17 - 01:50

O le fesoasoani tau seleni a le Malo mo le toe fo’i o fanau i aoga, o le a faamatuuina atu i le mamalu o le atunu’u pe a mae’a faigapalota laiti o loo loma nei, ina ia puipuia ai le filifiliga a Samoa mai ni tuuaiga o faatosina. Saunoa le Afioga i le Palemia le Susuga ia Laaulialemalietoa Leuatea Polataivao Fosi Schmidt, e mafua ona o le puipuiga o le Malo mai faamatalaga ma tuuaiga. “Talu ai o lea e loloma le faiga filifiliga a Samoa i le vaiaso fou.. Ua manatu ai, ina nei avea le faamatuu atu o le 150 tala ma mea e faaupu ai o se faatosina a le vaega faaupufai poo le faigamalo. “O lea ua manatu ai o le a tolopo le tuuina atu o le 150 i itumalo uma lava seia maea faigapalota laiti a Safata 1 ma Vaisigano 2.” O le talitonuga o le taitai o le atunuu; O le mea pito-i-sili lea ona faamaoni, ma ua ia manatu ai, ina nei mea ane foi ua tuu maa ae maa ia au. Ua faamautu mai ai le aso e tatau ona faasafua ai le seleni, pe a maea lelei faigapalota. “Ae malilie o le Aso 27 o le masina lenei e faataunuu ai le faigapalota ae o le Aso 28..ae o le Aso Toanai e sosoo ai, faatoa matala ai loa le tatou sa lea o le tuu atu o le tai $150 mo tagata uma lava o Samoa atoa.. “Lona uiga faatoa tala uma le tai 150 tala i le aso 28 o le masina lenei.” Saunoa Laaulialemalietoa o ia fesuiaiga laititi e mo le malu puipuia ma lelei le faamoemoe. “O totonu o le lua vaiaso lea e faatulaga ai le tufatufaina o le tai 150 tala – e tatalo atu i taitaifono $32.25 miliona tala e le o se tupe laititi ae o lea o le a tuu atu i taitaifono o fono faavae uma e latou te lufilufiina. “O lona uiga e tatau ona mataitu lelei le auala e faatino ai.”