Tulai i le Faamasinoga se Alii sa Molia mai i Osofaiga a Leoleo i Fualaau Faasaina

2026-03-09 - 18:19

O se alii e 50 tausaga le matua mai Fagali’i-Uta ma Asau i Savai’i, o John Kueva Macfall, sa tulai i luma o le Faamasinoga ona o moliaga e faatatau i le umia o fualaau faasāina, o le aisa ma le mariuana. O ia o se tasi sa molia mai osofaiga a leoleo lea sa faagasolo ao lei faia le Kerisimasi, ma o loo nofo taofia pea o ia. Na faailoa i taualumaga o le Faamasinoga, o le taeao o le 20 Tesema 2025, pe tusa o le 5:00 i le vaveao, na agai atu ai leoleo e faia se suesuega i le nofoaga o loo nofo ai Kueva i Fagali’i. I le taimi o le suesuega, na maua ai e leoleo se pepa sikareti lanu meamata i totonu o le potu moe o le ua molia. I totonu o lea pepa sa iai se tamai ato sipi na maua ai le 0.12 kalama o le fualaau faasāina o le aisa. Na faaauau pea suesuega a leoleo. Pe tusa o le 6:00 i le vaveao na latou maua ai se tamai ato faafafa lanu uliuli. I totonu o lea ato sa iai se pepa sikareti lanu mumu, na maua atu ai mariuana e tusa ma le 0.36 kalama o loo taai i se pepa paepae. Sa tulai John Kueva Mcfall i luma o le Faamasinoga ma ioeina moliaga e faasaga ia te ia, ma o loo p faatali nei mo le faaiuga a le Faamasinoga. Moliaga O moliaga o loo feagai ma le ua molia e aofia ai, • Umiaina o le fualaau faasāina o le aisa e tusa ma le 0.12 kalama, i lalo o Fuaiupu 17(1)(a) ma le 18(a) o le Tulafono o Fualaau Faasāina 1967 • Umiaina o le fualaau faasāina o le maruana e tusa ma le 0.36 kalama, i lalo o Fuaiupu 17(1)(a) ma le 18(b) o le Tulafono lava lea. Na faailoa i le faamasinoga o le maualuga o le faasalaga mo nei solitulafono e mafai ona oo atu i le 14 tausaga i le falepuipui Na taua foi i le faamasinoga o loo iai faamaumauga o se isi solitulafono sa faamaonia muamua mo le ua molia, lea na faamaonia i le 26 Aperila 2024. Na tulai i luma o le faamasinoga le tinā o Valasi Aiolupotea Tauilili Ele Aiolupotea, o le aunty o le ua molia. Sa ia talosaga i le Faamasinoga ina ia faamagalo pe faaitiitia le faasalaga mo John. Na ia faailoa i le Faamasinoga e leai ni matua o John, ma e talosaga atu ma le loto maualalo i le Faamasinoga ina ia silasila alofa i lona tulaga. Na saunoa le Faamasino, le afioga ia Fepuleai Ameperosa Roma, ua uma ona ioe le ua molia i moliaga o loo faasaga ia te ia. Peitai, o le a iloilo e le Faamasinoga le talosaga a le aiga pe mafai ona maua ai se faamama avega i le faasalaga. I le taimi nei, e lei faatagaina e le Faamasinoga le tatalaina o John, ma o loo taofia pea o ia a o faatali le faaiuga o lona faasalaga.